2007-ci ilin 12-16 fevral tarixlərində Parisdə, YUNESKO-nun iqamətgahında görkəmli xalça ustası, xalq rəssamı Lətif Kərimovun 100 illik yubileyinə həsr olunmuş “Azərbaycan xalça sənəti” mövzusunda IV Beynəlxalq simpozium keçirilmişdir. Simpoziumun təntənəli açılış mərasimində təşkilatın incəsənət, sənətkarlıq və dizayn bölməsinin müdiri İndirasen Ventqataçelum çıxış etmiş, YUNESKO-nun Azərbaycan mədəniyyəti, incəsənəti, elmi, ədəbiyyatı və xalçası ilə bağlı iki ildən bir maraqlı tədbir keçirir. Azərbaycan xalça mədəniyyətinin parlaq səhifələri yalnız Azərbaycan xalqına deyil, həm də dünya mədəniyyətinə məxsusdur. Simpoziumda azərbaycanlı alimlərlə yanaşı, dünyanın müxtəlif ölkələrindən gəlmiş sənətşünaslar iştirak edirlər. Hazırda dünyanın 1300 muzeyində Azərbaycan xalçaları nümayiş etdirilir. Bu, Azərbaycan xalçasının qədim tarixə malik olmasından və ona böyük maraq göstərilməsindən xəbər verir.

Sonra Azərbaycanın mədəniyyət və turizm naziri çıxış edərək demişdir ki, YUNESKO hələ 1983-cü ildə Azərbaycan xalçasına həsr olunmuş “Şərq xalçaçılıq sənəti” mövzusunda birinci beynəlxalq simpozium keçirmişdir. 1988-ci ildəki ikinci simpozium Azərbaycan xalça sənətinin inkişafı məsələlərinə həsr edilmişdir. Üçüncü simpozium 2003-cü ildə olmuşdur. Lətif Kərimovun 100 illiyinə həsr olunmuş IV Beynəlxalq simpozium YUNESKO kimi mötəbər təşkilatın binasında keçirilir və bu, bizim üçün böyük şərəfdir.

Nazir Mehriban xanım Əliyevanın simpozium iştirakçılarına təbrik məktubunu oxumuşdur.

Mərasimdə Azərbaycanın xalçaçılıq məktəbləri, bu sənətin inkişafında Lətif Kərimovun xidmətləri barədə ətraflı məlumat vermişdir.

Simpoziumda Azərbaycandan akademiklər Teymur Bünyadov “Lətif Kərimov dühası”, Rasim Əfəndiyev “Azərbaycan xalçaçılığında Qazax xalça məktəbi”, sənətşünaslıq namizədi Lalə Kazımova “Azərbaycan xalçası və muğam (ornamentallığa dair)”, sənətşünaslıq doktoru Röya Tağıyeva “Azərbaycan xalçası xalqın etnomədəni tarixi kontekstində”, Riçard Rayt (ABŞ) “Son 40 il ərzində Amerika və Avropadakı Azərbaycan xalçalarına həsr olunmuş tədqiqat işləri haqqında”, Vendel R.Svan (ABŞ) “Qədim Azərbaycan şahsevən xovlu xalça toxuculuğunun xüsusiyyətləri”, Robert Çensner (Böyük Britaniya) “Nəhəng “Lenin” xalçasının mənşəyi – “Şahnamə”, xalq dastanları və ikonostas”, Alberto Boralevi (İtaliya) “Azərbaycan sumaxları”, Yelena Saryova (Rusiya) “Üç qədim motivin XIX əsrin Azərbaycan xovsuz xalçalarında ikonoqrafiya və inteqrasiyası”, İvan Szanto (Macarıstan) “Heris: onun Azərbaycan xalçaçılıq tarixində yeri”, Bəkir Dəniz (Türkiyə) “Anadolu xalçaları ilə Azərbaycan xalçalarının bənzər özəllikləri”, İnna Naroditskaya (ABŞ) “Azərbaycanın muğam və xalçası”, Kərim Mirzəyi (İran) “Azərbaycan xalçası: Dərbənddən Sərbəndə qədər şahsevənlərin xalça nümunələrində” və Herbert Eksner (Almaniya) “Azərbaycan xovsuz xalça məmulatları – naxışları və artribusiya” mövzularında məruzələrlə çıxış etmişlər.

Məruzəçilər mahir xalça ustası Lətif Kərimovla bağlı xatirələrini söyləmiş, Azərbaycan xalçaçılıq sənətinin inkişafında onun rolundan danışmışlar.

Simpozium çərçivəsində Lətif Kərimovla bağlı sənədli film də nümayiş etdirilmişdir.

Tədbir çərçivəsində Lətif Kərimovun 100 illik yubileyinə həsr olunmuş “Azərbaycan xalçası” sərgisi açılmışdır. Sərgidə ustadın müxtəlif illərdə toxuduğu xalça nümunələri nümayiş etdirilir.

Maraqlıdır ki, YUNESKO-da Lətif Kərimovun sənəti ilə 24 il əvvəl əyani tanış olmuşlar. Həmin il YUNESKO-da keçirilmiş Azərbaycan ongünlüyündə quruma Lətif Kərimovun xalçası hədiyyə edilmiş və bu xalça indiyədək təşkilatda qiymətli hədiyyə kimi qorunub saxlanılır.

Simpozium və sərgidə Azərbaycanın Fransadakı səfiri Tarik Əliyev, ölkəmizin YUNESKO yanındakı daimi nümayəndəliyinin rəhbəri səfir Eleonora Hüseynova, senatorlar, Fransa ictimaiyyətinin nümayəndələri, Azərbaycan diasporunun təmsilçiləri, səfirliyimizin və nümayəndəliyimizin əməkdaşları, tələbələrimiz iştirak etmişlər.

Lətif Kərimov Azərbaycanın qədim mədəniyyət mərkəzi Şuşada anadan olmuşdur.  1929-cu ildə Bakıya qayıdan Lətif Kərimov 1930-cu ildən “Azərxalça” İstehsalat Birliyinin bədii-texniki rəhbəri olmuş, AMEA-nın Memarlıq və İncəsənət İnstitutunda şöbə müdiri işləmiş, 1960-cı ildən indiki Mədəniyyət və İncəsənət Universitetində pedaqoji fəaliyyət göstərmişdir. Onun eskizləri əsasında və rəhbərliyi ilə “Əfşan” (1931, 1957), “Qonaqkənd” (1939), “Ləçəkturunc” (1952, 1982), “Şuşa” (1953), “Göygöl” (1958), “Qarabağ” (1960), “İslimi” (1964), “Butalı” (1965), “Bahar” (1967, 1977), “Ağaclı” (1974) “Şəbi-hicran” (1975), “Heyvanlar aləmində” (1976), “Zərxara” (1977), “Xətai” (1981), “Əsrlərin nəğməsi” (1985), “Əcəmi” (1985), “Mehrabi Əcəmi” (1987) ornamental xalçaları, “Firdovsi” (1934), Nizami “Xəmsə”sinin motivləri əsasında toxunmuş 5 məşhur xalça (1940-41), “S.Vurğun” (1956), “Avtoportret” (1956), “N.Nərimanov” (1959), “M.P.Vaqif” (1967), “M.Füzuli” (1972), “İ.Nəsimi” (1974), “S.Urməvi” (1975), “M.Əcəmi” (1976) və başqa süjetli xalçalar toxunmuşdur. Sənətkar həmçinin Nizami adına Azərbaycan Ədəbiyyatı Muzeyi və Moskvada Ümumittifaq Xalq Təsərrüfatı Nailiyyətləri Sərgisinin Azərbaycan pavilyonunun portalları, tağları və interyerlərini bəzəyən müxtəlif memarlıq ornamentlərinin müəllifi olmuşdur.

L.Kərimov incəsənət tariximizdə çox nadir şəxsiyyətlərdəndir ki, yaradıcılığında praktika ilə nəzəriyyə paralel olaraq inkişaf etdirilib. Görkəmli xalçaçı rəssam və xalçaşünas alim dekorativ-tətbiqi sənətimizin ən qədim növlərindən biri olan xalça sənətinin tarixini mükəmməl səviyyədə bilirdi. O, Şərq mədəniyyətinin, İslam sənətinin ən incə mətləblərindən xəbərdar idi, Şərq ornament sənətinin simvolikasını, fəlsəfəsini elmi əsaslarla tədqiq edib, araşdırıb, fundamental elmi əhəmiyyətə malik monoqrafiyalar nəşr etdirmişdi. Onun üçcildlik “Azərbaycan xalçası” adlı kitabları, xüsusən də birinci cildi nəşr olunandan qısa müddət sonra bütün dünyaya yayılmış və sənət biliciləri arasında yüksək rəğbət qazanmışdı. Avropa, Amerika, Şərq ölkələrindən  məşhur xalçaşünas alimlər və ekspertlər ona çoxsaylı məktublar göndərərək kitab haqqında qiymətli fikirlərini bildirmişdilər.

L.Kərimovun xalq sənətimizdən qaynaqlanan dərin bilik və bədii zəkası nəticəsində toxunmuş xalçalar özünün kompozisiya quruluşu, rəng həlli, bədii-estetik əhəmiyyəti və texniki işlənilmə xüsusiyyətlərinə görə XX əsr Azərbaycan incəsənətinin qiymətli xəzinəsi hesab olunur.

L.Kərimov 1950-ci ildə xalça sənətimizlə bağlı apardığı fundamental elmi tədqiqat və araşdırmalarına görə sənətşünaslıq namizədi elmi dərəcəsi almışdır. Əhatəli elmi və bədii yaradıcılıq fəaliyyəti yüksək qiymətləndirilən sənətkar SSRİ Dövlət mükafatı (1950), respublikanın Əməkdar incəsənət xadimi (1955), Xalq rəssamı (1960), “Xalqlar Dostluğu” ordeni (1986) kimi yüksək mükafat və təltiflərə layiq görülmüşdü. Müstəqillik illərində Prezident İlham Əliyevin sərəncamı (27.10.2006) ilə xalçaçı rəssam və sənətşünas alimin 100 illik yubileyi qeyd olunmuşdur.

2006-cı ilin noyabr ayında Azərbaycan xalça sənətinin inkişafında böyük xidmətlər göstərmiş xalq rəssamı, SSRİ Dövlət mükafatı laureatı Lətif Kərimovun anadan olmasının 100 illiyi tamam olması münasibətilə tədbirin layiqincə keçirilməsini təmin etmək məqsədi ilə Prezident İlham Əliyev  qərar qəbul etmişdir.